Gita Sancaya, Tembang Ngured

Olih: Wang Dusun (I Wayan Pandé Sumardika)

 

Under the Shadow of White Flower Olih I Wayan Sujana "Suklu"

Ada kidung rikala mangungsi wukir

Duk amurang lampah

Manungkulang sungsut ati

Miijil tembang saking manah

Daging kidung méh crita di gumi

Katuturan reko

Imanusa nyalanin uripné

Satingkahnya salampahing budi

Kalaning mamunyi

Tuturé maganti ganti

Tuara resep tutur tuhu

Sok mangajar mapi mapi

Manguronin anak lian

Twara inget iban miskin

Tuna sastra tuna widya

Tuara tepuk gina damping

Mangumbar mangambyar ujar

Mananjayang bibih paling

Kema mai ngadep satwa

Katungkul idepé bingung

Nyén sih suka madingehang

Gudug bintit

Pulang paling maruncungan

Tondén suwud

Amunto mangadol tutur

Masih ya mamada

Mangulurin daya singkil

Mabet sadu

Mangangkurang munyi tawah

Kéto gawénnya salemah

Bilang wai glindang glindeng ngadep munyi

Lén bin ungguhang ring buku

Né a cakep dadi dwa

Né dwang cakep bisa dadi satus buku

Asing kodag manyatwayang

Uli smara kayang mati

Sakatah tingkahing urip

Suba mati malih lekad

Ada masih buin reko

Manuturang laku lampah

Mangalihin kadyatmika

Makebur tuturé nambung

Sinomé mapi manawang

Ngaku tatas madan sunya

Ané puyung ané misi

Suba lapah ngrangsuk sastra

Saraja busana sidhi

Isin puyung tutur jati

Suba ya tekek kategul

Telah kalis ban mangupak

Sakatahing sastra aji

Ngaku weruh 

Masuci madurmanggala

Yén pinehang buka anak liwat édan

Bibihé liwat lamis

Uyang pati cabcab

Bingah binguh santulan

Lali tekén awak diri

Lakuné singsal

Nyelsel manandang tangis

Sapunika solah jadma paling

Ya malaku laku tani karwan

Bas kategehan tuturé

Tingkahé demen ajum

Mangulurin dayané celig

Ulap kén arta brana

Iju ngadep tutur

Mamiratin pipis anak

Tong bisa menggat ruh awaké padidi

Mapi nambanin anak

Kadén saja sakti nanging twah puyung

Sangkan eda ulah mapi

Paling melah ngardi hayu

Suka duka lara pati

Twah mawit lekad ri panon

Puput sampun gembangé kaigum

De wang dusun praya

Duk iseng mangunsi wukir

Ngumambang mijil ring kahyun

Maganti ganti kakidungé

Reng ginada mincang mincung

Ngamungkur ngamélad semara

Sinomé kadi mas kembang

Sakalangon durmitané nandang manis

Ngangobin sang ningal

Ngawé minggat ruhing ati

Mamangguh kang sukadriya

Ampura wantah babelogan i dusun

2016