Gending Anak Buduh*

Olih: Sapardi Djoko Damono

Gagambaran olih Slamet Priyadi

I
tiang sing buduh, jero

sakéwala cerik-ceriké ngéwérin

anaké pada ngedékin

dugas tiang ngorahang : tiang timpal i déwané

cerik-ceriké ané nyeh pada malaib

ané lénan nyagjag nimpugin aji batu

II

di batan punyan trembisiné tiang ngeling

duur carangné dingeh tiang kedis nguci

cerik-ceriké nyambat : baud gati anaké buduh ento

awai bentet ngeling sengu-sengu

anaké ane mentas di rurunge

ngraos adéng : sangkal anaké ento buduh

bas sanget ngenehang linderan gumi

III
jani tiang majalan mirig rurung

sambil magending : tiang boya jatma buduh

uli jelanan miwah jendélané

tinggalin tiang makejang anaké ngitukang sirah:

padalem anaké ento, ipidan polos gati

jeleké tong dadi kelidin, keto ia jani

IV
nepak wadah luu miwah tiang listrik

tiang ngéngkog sambil ngendingang basang seduk

yén jani sing masih madaar

genep suba telung wai makenta

pekené suung suba, déwa ratu

sing ada buin anak maang ngidih nasi

kija lakun ngidih jani, kija

V
anaké ento makelo suba buduh, kéto ada nyambat

ngudiang jani seming létég muané

apa ngranaang ia kakéto

makejang anaké lakar orahin : tiang sing buduh

tiang jatma seduk, jero

VI
dingeh ada anak luh majeritan:

da gulgula anaké buduh totonan

nyanan teked dija ubera

jatma kotané makejang ngawai-wai, duh mémé

nyambah tiang jalema buduh

tiang tuah ngeling tan pakrana

kedak-kedék salantang rurung

di jendélané anaké pakituk :

berag gati ia sekaté buduh

*Kabasabaliang olih IDK Raka Kusuma saking versi basa Indonesia sane mamurda “Sajak Orang Gila”