Bonéka

Luh Murti nyansan nyelékang kahanané. Sabilang wai geginané tuah bengang-bengong dogénan. Paliatné joh nerawang tusing ngelah tetujon. Awakné nyansan meragang. Pipiné ané pidan ngawai dadi plalianan timpal-timpalné, jani suba perok. Yén peteng teka, ipun ngeling. Tusing ada nawang apa ané makada. Tusing ada angin, tusing masi ada ujan, Luh Murti paling, apa ané ada di aepané makejang sabatanga. Elingné tusing suud-suud. Tusing ada bani maekin, jejeh Luh Murti lakar nyemak gaé ané boya-boya. Petengé sepi, tuah bonéka Marsha ané setata nimpalin ipun nyalanang idup.

Bonéka ento hadiah uling Méménné dugas ipun ulang tahun. Demen pesan kenehné maan hadiah bonéka Marsha. Kamulan jani tuah film kartuné ento ané demenina tekén cerik-ceriké. Méménné suba nawang ipun dot sajan ngelah bonékané ento. Sakéwala mara jani Méménné nyidang ngulehang pipis anggon meliang.

“Suba beliang Mémé bonéka ané dotin Luh. Luh musti rajin malajah nah, eda pati ngenehang ané boya-boya. Sekenang kenehé malajah apang dueg. Yén suba dueg, mani puanan Luh lakar dadi anak maguna. Liu anaké ané lakar ngalih.”

Pabesen Méménné setata ingetanga tekén Luh Murti. Nanging ané dadi kenehanga, ngudiang Méménné ngeling suud ngemang bonékané ento?

“Ngudiang Mémé ngeling? apa ane sebetang Mémé? Ulian Bapa ae, Mé?”
Méménné Luh Murti ngusap-usap yéh paningalané laut makenyem nolih pianakné suba nyansan kelih, suba nawang ngrasayang apa ané rasanga tekén ipun.

“Tusing Luh. Mémé ngeling bagia ulian I Luh suba gedé. Demen Mémé ningalin.”

Luh Murti tusing buin matakon. Paningalané iteh nolih bonéka ané belianga tekén Méménné. Kenehné bungah. Liang tusing karuan. Indeng-indenganga bonékané ento satmaka adinné padidi. Petengné bareng ajaka masaré. Aken maduman saput. Sajan anak cerik, bonékané saputina apang tusing gesit. Yén digantiné Luh Murti lakar luas masuk ka sekolah, ipun setata niman bonékané ngorahang lakar luas masuk. Bonékané jani tuah dadi timpal ané paling sayanganga.

Neked jani bonékane ento enu abana, tusing dadi leb nang akejep, geluta tekek pesan. Tuah bonékané ento ané dadi timpal ipuné. Yadiastun timpal kudang timpal teka nengokin Luh Murti, nyama kudang nyama nengokin, kéto masi guru-guruné di sekolah milu teka, tusing masi nyidang ngaénang Luh Murti kadi jati mula.

“Murti, niki Ibu Madé. Murti énggal seger nah, suba antianga ajak timpal-timpalé di sekolah. Ajakina bareng malajah buin. Malajah magending, malajah ngambar, ngitung muah mamaca. Yén Murti enu buka kéné, sinah timpal-timpal Murtiné milu sebet,” Bu Guru Madé ngalemesin Luh Murti, ngemang semangat apang nyak ngedénang bayu sida seger mawali.

Luh Murti tusing masaut nampi raos Ibu Gurunné. Luh Murti tileh nengil buka togogé ane adepa di sisin jalané. Atmané sahasa tusing ada di raganné. Muanné seming leteg cara tusing ada getih membah nang abedik. Bokné nyansan keweh baan nyuahin sawiréh suba abulan lebih ipun tusing maan mambuh. Kulitné mueg tusing maan mandus.

Sasukat Méménné tusing mulih-mulih ipun dadi buka kéné. Suba abulan Méménné tusing magatra. Luas tusing ngorang-ngorang. Bapanné paling ngalih kema mai. Nyaman-nyaman Méménné makejang takonina, tusing ada nawang. Kéto masi keluargané uli muani, makejang tusing maan nepukin Méménné Luh Murti. Nganti Bapanné ngalapor ka Kantor Polisi, ngorahang somahné ilang. Polisiné digelis ngemang pengumuman anak ilang ka masyarakat. Foto neked cecirén Méménné Luh Murti rauhanga ka masarakat. Di media sosial masi suba umumanga. Kudang jalan kadén suba kamargiang, kéwala neked jani Méménné Luh Murti tusing ada ngenah muncuk cunguhné, tusing bakatanga tekén polisiné.

“Nunas tulung tiang sareng Bapak, punapi antuk somah tiangé mawali. Padalem tiang pianak tiangé Pak, suba cara anak kena aji pangiwa, cara anak buduh, tusing nyak pesu, kéto masi tusing nyak ngomong. Tulungin tiang, Pak!” Bapanné Luh Murti ngeling di aepan Pak Polisiné.

“Jagi utsahayang tiang malih Pak. Tiang nunas, Bapak mangda sabar. Astitiang mangda somah Bapak sida kapanggih,” Pak Polisi nyautin laut magedi buin mautsaha ngalih Méménné Luh Murti.

Sabilang neked di jumah, Bapanné Luh Murti nengokin pianakné ané sedeng maplalianan ngajak bonékané ento. Mara lakar paekina tekén Bapanné, Luh Murti makraik buka anak karangsukan. Bapanné buin maekin, nyansan ngerasang ipun makraik.

“Endepang awaké! Nyai jeg peta dogén gelahanga. Sing lek kéto ajak pisagané, nyai kraik-kraik suba cara anak buduh,” nengkik Bapanné Luh Murti sambilanga nyambot bokné pianakné.

Luh Murti mendep. Awakné ngetor. Bonékané ketes joh di bucun kamaré ulian tendanga tekén Bapanné. Bonéka ené tusing pesan demenina tekén Bapanné. Yéh paningalané majalan uli di pipiné Luh Murti neked di jagutné. Téngésné pesu. Uabanga di bajunné.

“Eda buin mangelingin Mémén nyainé ané suba magedi. Depang suba Mémén nyainé luas. Ento suba upah dadi anak luh ané sing nyak nuutin munyi ané muani. Suba atiban Bapa dot ngelah somah, jeg Mémén nyainé mamengkung tusing nyak kamaduang. Abodag Bapa baanga munyi. Empeng koping Bapané ningehang. Jani to pang tawanga rasané. Demen keneh Bapa tusing buin nepukin muan Mémén nyainé. Diapin kudiang ban polisiné ngalih, tusing lakar ada nawang. Baang pang alih-alihina, pang kadéna seken Mémén nyaine ilang.”

“Yén nyai nyak seger, nyak nuutin munyin Bapané, Bapa lakar sayang jak nyai. Lakar asukang Bapa nyai nganti dadi sarjana. Kéwala, yén nyai tusing nyak nuutin munyin Bapané, apabuin nganti ngorahang kéné-kéto tekén anak lén unduk Mémén nyainé ane suba ilang ento, eda pelihanga Bapa yén nyai tusing lakar buin nyidang maangkian,” Bapanné Luh Murti nengéng paningalane sinambi mamunyi laut magedi.

Luh Murti nyangetang ngetor awakné. Ipun tuah anak cenik mara kelas 4 SD, baanga munyi kasar buka kéto, sinah ipun takut. Jejeh. Yén ngalawan, apa men anggon? Awakné cenik, gemelané tusing ja amongkén gedénné. Bonékané jemaka, singala buin sambilanga kemak-kemik mirib Luh Murti nuturang unduk sebet di kenehné.

Suba abulan Luh Murti tusing masuk. Guru ajak timpal-timpalné baanga acepok melali nengokin Luh Murti. Bin amingguné, Bu Guru Madé ngajak Bapak Kepala Sekolah buin teka lakar nyingakin kénkén kahanané Luh Murti, kéwala tusing baanga macelep tekén Bapanné Luh Murti. Kéto masi nyaman-nyaman Méménné tusing ada baanga macelep buin ka tengah. Nyaman-nyaman Méménné laut ngalaporang unduk Luh Murti ané tusing dadi dengokin.

Polisiné di gelis ka umahné Luh Murti. Neked drika, pintuné makunci. Bél umahné mati. Polisiné maksa muka pintuné ento. Jemakanga linggis lakar anggon noktok umah kunciné. Mara lakar kabuka paksa, teka lantas anak muani truna tua uling dura nusa muka pintuné uling di tengah. Anak muani ento nyambatang Bapanné Luh Murti tusing ada di jumah. Luh Murti ajaka bareng luas ngajak Bapanné ngalih-alihin Méménné. Polisine makejang tusing precaya. Sawiréh polisiné maan laporan uli keluarga Méménné Luh Murti ané tusing baanga macelep nengokin kaponakané.

Polisiné laut macelep. Anak muani ento paling, mautsaha tusing ngemang.

“Jangan masuk, Pak!”

“Kamu siapa? Apa hakmu untuk tidak memberikan kami masuk ke dalam?”

“Saya penjaga rumah ini, Pak. Saya diperintahkan untuk tidak membiarkan masuk siapapun ka rumah ini oleh majikan saya.”

“Kamu bisa kami hukum karna sudah menghalangi tugas polisi,” polisiné nengkik mirib gedeg ulian tusing baanga macelep. Nyansan soléh tepukina sareng polisiné sawiréh celana bawak mawarna putih ané saluka tekén anak muani ento sada belus tur misi warna barak.

“Maaf, Pak. Ini perintah majikan saya.”

Polisine tusing ngarunguang tur maksa macelep. Anak muani ento gisianga. Polisi ané lénan macelep ka tengah umahé. Sakabesik kamaré celepina. Nganti ada sinalih tunggil polisiné makraik ngaukin timpal-timpalné. Makejang magrudugan. Makejang makesiab nepukin Luh Murti di betén maplisahan naanang sakit. Yéh paningalané deres ngetél, kéto masi ada laad tel-telan getih barak masawang selem. Jagjagina Luh Murti. Limanné di kébot tekek ngisiang bonéka ané dadi saksi ipun kaparikosa lan kénkén unduk kasujatian Méménné. Ngeling ipun sigsigan laut nujuhin pundukan di durin umahé ané ngenah uling di kaca kamaré sambilanga mamunyi.

“Me!”

Kacang Apit, 30 Agustus 2015

NB: Satua cutet kakawian I Komang Alit Juliartha puniki naanin kamuat ring rubrik Médiaswari (Pos Bali) rahina Redité Paing, 25 Oktober 2015