Bali Suar Tanah Dumilah

Murdan Cakepan : Bali Suar Tanah Dumilah

Pangawi : Putu Sedana

Kawedar Antuk : Balai Bahasa Dénpasar

Warsa : 2003

Tebel : v + 56 kaca

Bali Suar Tanah Dumilah, wantah murdan cakepan pupulan puisi saking Putu Sedana. Madaging 45 puisi kakawian dané, nanging puisi sané mamurda Dama ring Padéwékan wantah terjemahan saking puisi basa Indonésia kakawian dané sané mamurda Damai Dikedirikan.

Lianan ring Dama ring Padéwékan, murdan puisi sané wénten ring cakepané puniki inggih punika “Bali Suar Tanah Dumilah, Apa Buka Apa, Macunduk di Pesisi Kuta, Satua-Satua Anyar, Kasined di Balik Duara, Gatra Saking Padukuhan, Jepun Petak lan I Teruna, Gending Dangap-Dangap, Bunga, Buka Apa, Kalah Ngipi, Maurip ring Panataran Dama, Téja Guling, Uripé Sayan Mabunga, Sekar Kedaton, Kintamani, Ngepik Tanah Plekadan, Sura Mauah-uah, Patapan Pecuat, Jengahé Mabunga-bunga, Pitik Bengil, Yén Preginané Suba Nyemita, Preyayi Tua, Prani Lara, Lovina Jiwan Titiang, Mastiang Idupé Buka Bunga, Semita Masatua Daa, Mr. X, Nagih Menang Pedidi, Ngalap Ipian, Pudak Sumekar, Ri Kala Lingga Tajené Sirna, Semitané Masuar Tangi, Simenes, Apaké Ia?, Jengahé Matanggu Buka Ia, Ilang di Pajantenan, Cimpedan ri Kala Punyah, Morbor Langit Pagaluhan, Mati Nguda, Tembang Puri Kasmaran, Sang Katunan Pangan Kinum, Mirah...Lascarya I Ratu Ninggal Titiang, lan Kakebahan Manah.”

Silih sinunggil puisi ring cakepané puniki sané mamurda Mati Nguda wantah puisi pemenang Sayembara mengarang puisi Bali modéren sané kalaksanaang olih Lembaga Bahasa Nasional Cabang I Singaraja warsa 1969. Niki wantah daging puisi punika.

Mati Nguda

Madia

magantung senjata lanang

sirah

tekes bendéra gelah

barak-barak

lambé maules kenyung

putih-putih

karsa tulus mulus

tegal pangkung katerabak

tatah mirah parangan

kerobok duin urip

mapinunas lekad

pang maan buka kéto

sambilanga sing tawang

nyén nundén muah ngajinin

suku pancer gumi

Suka bakti pertiwi

takut sura sing katimpalan

nyerit

Belanda musuh kai

barak

surya

swara

bawa

laksana

Angga tidong gelah

kentelan serbuk tanah

urip

tungkulan suling tawah

atma

sing bisa puun

maweweh suara tan di cadik

meseh katon kelepon

terumbag gelar yuda

nyerit

Belanda musuh kai

tepuk unduk buka jani

Madia

magantung sanjata lanang

sirah tekes bendéra gelah

marengin kenyitan api

kuning bering

nyohsoh

serah angga

pertiwi

Magerebyug

tangkahné bolong

Barak barak

lambé maules kenyung

putih putih

karsa tulus mulus

ambu

sumirit ngebekin jagat.

(Mati Nguda, kaca kaping 41-43)

Yéning rereh ring rasa basa, puisi ring cakepané puniki sakadi nénten ja kirangan ‘raos makulit’ sané ketah kabaos majas sekadi ring lengkarané puniki “Angin pagunungan sumilir nglukat segara......” (Lovina Jiwan Titiang, kaca kaping 25), wénten taler lengkara sakadi puniki “legané nyatur langit....” (Bali Suar Tanah Dumilah, kaca kaping 1), lan kantun akéh taler majas ring cakepané puniki.

Niki wantah daging puisi sané mamurda Kintamani taler akéh nganggén ‘basa makulit’

Kintamani

Angin suwung ngusap cemara padukuhan

lumut mabunga api

sétra tawah wangun suka mati di pabinan

Baris jojor partapukan

sunari mapag tresna sing mabucu

macunduk masaput limut

liang di tembang pabungahan

Toyabungkah mahbah aksara salawas yusa

astasura ratna bumi banten

bungan langit