I Madé Sanggra

I Madé Sanggra (almarhum) wantah silih sinunggil pangawi sénior sané maduwé komitmen ngalestariang sastra Bali modéren. Dané embas ring Sukawati, Gianyar warsa 1926. Dané ngawitin ngripta sastra Bali modérn warsa 1970 antuk nyarengin sayembara taler dados juara ring sayembara punika antuk satua cutetnyané sané mamurda Katemu ring Tampak Siring. Satua cutet punika taler kadadosang lakon arja olih Prof. Dr. I Wayan Dibia daweg Pésta Kesenian Bali (PKB) 2005. Pupulan puisi Kidung Républik (1997), ngamolihang Penghargaan Sastra Rancagé ring warsa 1998. Pupulan puisi puniki pinaka pupulan puisi sastra Bali modéren sané kapertama ngamolihang Penghargaan Sastra Rancagé.

Sareng pangawi sastra Bali modéren Nyoman Manda saking Gianyar, Madé Sanggra kantos lingsir kantun nerbitang majalah sastra Canang Sari. Dané ngalahin (séda) rahina Buda, 20 Juni 2007.

Kakawian-kakawian dané sané sampun kawedar inggih punika:

Ganda Sari (Pupulan Puisi, 1973 sareng Nyoman Manda)

Kidung Républik (Pupulan Puisi, 1997)

Katemu ring Tampak Siring (Pupulan Satua Cutet, 1970, 2004)

Niki wantah silih sinunggil puisi kakawian dané sané mamurda “Dénpasar sané Mangkin” sané kaambil saking cakepan “Dénpasar lan Don Pasar (2013)”

DÉNPASAR SANÉ MANGKIN

(I Made Sanggra)

dénpasar sané mangkin

katah pwangun nyujuh langit

makwéh sawah dados umah

umah dados sawah

dénpasar sané mangkin